Sumqayıtda küçə heyvanlarının yerləşdirilməsi üçün sığınacaqlar yoxdur. Həmçinin şəhər əhalisi öz ev heyvanlarını müalicə üçün aparmağa xüsusi klinika tapa bilmir. Bu haqda Sumqayıt24-ə izləyicilər bildirib.
Deyilənə görə, son zamanlar şəhərin mərkəzində, bundan əlavə insanların istirahət etdiyi park və bulvarda, küçə itləri yayılıb. Onlar ən çox “Dənizkənarı bulvar”, “Nəsimi” və “Heydər Əliyev” adına parkda məskunlaşıblar. İnsanlar həmin itlər üçün sığınacaqların olmamasından narazıdırlar.
Klinikaların olmamasına gəldikdə isə, Sumqayıt sakinləri öz ev heyvanlarının müayinə, müalicə etdirmək üçün Bakıdakı klinikalara üz tutmalı olurlar.
“İtlərin heç kəsə zərəri yoxdur. Sadəcə, onları sığınacaqlara yerləşdirib peyvəndləsələr, daha sonra yenidən buraxsalar, və ya onlara sahib çıxan olsa, hər şey əla olar. Amma heyf ki, Sumqayıtda xüsusi sığınacaqlar hələ də yoxdur”,- izləyicilərimizdən biri bildirib.
“Bu boyda şəhərdə heyvanlar üçün bir klinika yoxdur. Məcbur oluruq pişiyimizi götürək o qədər yolu gedək Bakıya”,- sakinlərdən biri dedi.
