Bu gün Sumqayıt hadisələrinin ildönümüdür.
1988-ci il fevralın 27-dən 29-na qədər Sumqayıt şəhərində əvvəlcədən planlaşdırılmış təxribat xarakterli qırğınlar baş verib. Hadisələrin təşkilində şəhər əhalisi arasına yerləşdirilmiş, Azərbaycan dilində sərbəst danışan erməni mənşəli təxribatçı qrupların xüsusi rolu olduğu bildirilir. Həmin qrupların SSRİ DTK-sının himayəsi altında fəaliyyət göstərdiyi qeyd olunur. Onlar şəhərin müxtəlif ərazilərində iğtişaşlar törədib, nəticədə 26 erməni milliyyətindən olan şəxs qətlə yetirilib.
Şəhərə yeridilən, general Krayevin rəhbərlik etdiyi hərbi hissələr isə hadisələrə dərhal müdaxilə etməyib və yalnız fevralın 29-da proseslərə qoşulub. Müdaxilə zamanı 6 azərbaycanlı tankların altında qalaraq şəhid olub, 400 nəfər müxtəlif dərəcəli xəsarət alıb. Ümumilikdə 200 mənzil talan edilib, 50 mədəni-məişət obyekti dağıdılıb, 40-dan çox avtomobil yararsız hala salınıb.
Hadisələri araşdıran keçmiş SSRİ Prokurorluğu və DTK nümayəndələrindən ibarət istintaq qrupu isə bütün məsuliyyəti azərbaycanlıların üzərinə yıxıb. Nəticədə 3 minə yaxın günahsız Sumqayıt sakini həbs olunub. Onlardan 400 nəfər inzibati məsuliyyətə cəlb edilib, bir çoxu rüşvət verərək azadlığa çıxıb, 94 nəfər barəsində isə cinayət işi açılıb.
