"Qarabağ"a qarşı yaxşı oynadıq. Əlbəttə, üzərində işləməli olduğumuz məqamlar var. Amma hələ mövsümün ikinci oyunudur və hər oyundan-oyuna bu detalları yaxşılaşdıracağıq".
Bu sözləri açıqlamasında "Sumqayıt" futbol klubunun yeni legioneri Jeam Oliveyra deyib.
Brazilyalı futbolçu komandasının Misli Premyer Liqasının 3-cü turunda "Qarabağ"a məğlub olduğu oyunu şərh edib:
"Qarabağ" 11 nəfərlə oynayanda da matça nəzarət edən biz idik. Rəqibin futbolçusu qovulduqdan sonra daha ehtiyatlı oynamağa başladılar və əks-hücumlara üstünlük verdilər. Penaltini də belə əks-hücumların birində, fərdi epizod nəticəsində qazandılar. Qol buraxdıqdan sonra da cəhdlərimizi davam etdirdik, amma onlar müdafiədə çox yaxşı təşkilatlandıqları üçün qol vura bilmədik".
31 yaşlı futbolçu heyətin kasad olmasının komanda üçün yaratdığı çətinliklərdən söz açıb:
"Heyətin kasad olması müəyyən qədər çətinlik yaradır. Çünki məşqçinin öz strategiyası var və onu tətbiq etmək üçün futbolçular lazımdır. Məsələn, oyun sistemini dəyişmək, oyun ərzində fərqli gedişlərdən istifadə etmək... Bəzən oyunun sürəti aşağı olur və məşqçiyə sürətli futbolçu lazım olur, yaxud əksinə. Bəzən isə daha çox topa sahib olmaq istəyirik. Bu tapşırıqları həyata keçirmək üçün futbolçular lazımdır və heyət kasad olanda bu, işimiz bir qədər çətinləşir. Amma dediyim kimi, bu, hələ mövsümün cəmi ikinci oyunudur. Biz çox inkişaf edəcəyik və əminəm ki, əla mövsüm keçirəcəyik".
Qeyd edək ki, "Sumqayıt" - "Qarabağ" matçı qonaqların minimal hesablı (0:1) qələbəsi ilə başa çatıb.
Mənbə: Sport24.az
