Sumqayıt şəhərinin yerləşdiyi Abşeron yarımadasına qızmar istilər gəlib. Havanın temperaturu 40 dərəcəyə yaxınlaşır. Odur ki, isti yay günlərini bağ evində keçirməyi planlaşdıranlar günəş şüaları ilə ehtiyatlı davranmalı və sağlamlıqlarına qarşı diqqətli olmalıdırlar.
Sumqayit24.az məlumat verir ki, rusiyalı nevroloq Yekaterina Demyanovskayanın sözlərinə görə, havanın temperaturu +30…+35 °C olduqda, hətta sağlam insanlarda belə ürəyə düşən yük 2-3 dəfə artır. Bu cür hava şəraitini xüsusilə artıq çəkidən əziyyət çəkən, yüksək qan təzyiqi və digər ürək-damar xəstəlikləri olan insanlar daha çətin keçirirlər. Belə şəxslərə günəş altında 30 dəqiqədən artıq qalmamaq və əsas vaxtlarını kölgədə keçirmək tövsiyə olunur.
Demyanovskaya həmçinin qeyd edib ki, ağır fiziki işləri günün erkən saatlarında planlaşdırmaq daha doğrudur. Günvurma əlamətləri hiss olunduqda isə dərhal sərin yerə çəkilmək, dar geyimləri çıxarmaq, uzanmaq və təmiz ya da mineral su içmək lazımdır.
"Günvurma zamanı başgicəllənmə, baş ağrısı, nəfəs darlığı, ürəkbulanma, soyuq tər və ya bədənin isti və qızarmış olmasına baxmayaraq tərləməməsi müşahidə edilə bilər. Əgər insan tərləmirsə, bu, artıq bədənin istilik tarazlığının pozulduğunu və orqanizmin özünü soyuda bilmədiyini göstərir”, – deyə mütəxəssis xəbərdarlıq edib.
