Sumqayıt Dövlət Dram Teatrında yeni mövsümün başlaması ilə bağlı iclas keçirilib. Bu barədə 8 sentyabr tarixində teatra istinadən xəbər veririk.
Teatrın direktoru, Əməkdar artist Vidadi Məmmədov kollektivi salamlayıb, yeni mövsümün həm də sənət ocağının yubiley ilinə təsadūf etdiyini xatırladaraq yaradıcılıq palitrasının, repertuar siyasətinin daha da çeşidli və zəngin nəzərdə tutulduğunu bildirib. Daha sonra teatrın baş rejissoru, respublikanın Xalq artisti Firudin Məhərrəmov 55-ci, yubiley mövsümündə də maraqlı tamaşaların və yubiley tədbirlərinin planlaşdırıldığını söyləyib. Baş rejissor çıxışında uşaq tamaşalarına tələbatın çox olduğunu diqqətə çatdırıb. Ötən mövsümdən məşqləri başlanılan Ü. Hacıbəyovun "O olmasın, bu olsun" (quruluşçu rejissor - Əməkdar artist Namis Şirməmmədov) və Ə.Haqverdiyevin "Kimdir müqəssir" (quruluşçu rejissor - Fuad Kazımov) tamaşaları yaxın günlərdə təhvil veriləcək. Qürur məqamımız olan Zəfər günü ilə bağlı Hafiz Ataxanlının qələmə aldığı, Xalq artisti F.Məhərrəmovun quruluş verdiyi "Missiya" tamaşası şəhid ailələri və qazilər üçün xüsusi olaraq oynanılacaq.
Ulu öndər Heydər Əliyevin 100, Azərbaycan teatrının 150, Sumqayıt teatrının 55, dahi mütəfəkkir Hüseyn Cavidin 140, Əhməd Cavadın 130 illik yubileyləri üçün tamaşa və ya ədəbi-bədii gecələrin hazırlanması da yaradıcılıq planları içərisində önəmli yer tutur.
Sonda baş rejissor F.Məhərrəmov teatrda daxili imkanlar hesabına kitabxana yaradıldığını bildirib və hər kəsi bu təşəbbüsə qoşulmağa çağırıb.
