Sumqayıtda mikrorayonlardan birində tez-tez təmir işləri aparılan ərazinin vəziyyəti narahatlıq doğurub.
Sumqayit24.az-a daxil olan məlumata görə, 18-ci mikrorayonda, 20 saylı binanın yaxınlığında yerləşən su borusunda tez-tez problemlər yaranır.
Vətəndaşların iddiasına əsasən, aidiyyəti qurumun əməkdaşları problemlə bağlı əraziyə gəlsələr də, nasazlıq tam aradan qaldırılmır. Bu səbəbdən ərazidə asfalt örtüyünün dəfələrlə qazıldığı, lakin problemin köklü şəkildə həll edilmədiyi bildirilir.
"Bura, bəlkə də, hər ay qazılır, sonra asfalt örtüyü çəkilir və yenidən qazılır. İnsanın heyfi gəlir çəkilən asfalt örtüyünə. Problem tam həll edilsə, vəziyyət belə olmazdı. Borulara çubuq və taxta vurub gedirlər. Bu borular yenilənsə, nasazlıq tam aradan qaldırılar", – deyə vətəndaş narahatlığını ifadə edib.
Məsələ ilə bağlı Sumqayit24.az-a İri Şəhərlərin Birləşmiş Su Təchizatı Xidmətindən bildirildi ki, dünən sözügedən ərazidə istismar müddəti bitmiş və tez-tez qəza yaranan borunun 9 metr hissəsi dəyişdirilərək yenisi ilə əvəz olunub.
