Sumqayıt şəhərində iş yoldaşına xəsarət yetirməkdə ittiham olunan 1958-ci il təvəllüdlü Adil Babayev barəsindəki cinayət işi üzrə məhkəmə prosesi başa çatıb.
Məlumata görə, hadisə "Stansiya Sumqayıt" qəsəbəsində yerləşən dərman zavodunda baş verib.
Belə ki, Adil Babayev iş yoldaşı Nəriman Hüseynovu növbə dəyişimi məsələsinə görə yaranan mübahisə zamanı əvvəlcə yumruqla vurub, daha sonra kətmənlə baş nahiyəsinə xəsarət yetirib.
Ona Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham verilib və iş Sumqayıt Ağır Cinayətlər Məhkəməsinə göndərilib.
Cinayət işində olan ölüm haqqında şəhadətnamənin surətindən və elektron məhkəmə portalından əldə edilmiş çıxarışdan müəyyən olunur ki, təqsirləndirilən şəxs 10 noyabr 2025-ci ildə vəfat edib.
Məhkəmədə hüquqi varis – həyat yoldaşı cinayət təqibinə bəraətverici əsaslar olmadan xitam verilməsini xahiş edib, müdafiəçi də bu mövqe ilə razılaşıb. Dövlət ittihamçısı isə təqsirləndirilən şəxsin vəfatı ilə əlaqədar cinayət təqibinin xitamına etiraz etməyib.
Sumqayıt Ağır Cinayətlər Məhkəməsinin hökmü ilə Babayevin barəsində Cinayət Məcəlləsinin 126.1-ci maddəsi ilə olan cinayət təqibinə Cinayət-Prosessual Məcəlləsinin 39.1.5-ci maddəsinə əsasən xitam verilib. Təqsirləndirilən şəxsin barəsində seçilmiş ev dustaqlığı qətimkan tədbiri qüvvədən düşmüş sayılıb.
Qeyd edək ki, ad-soyadlar şərtidir.
Mənbə: Demokrat.az
