Sumqayıtda mikrorayonlardan birində yerləşən yaşayış binasının vəziyyəti ciddi narahatlıq doğurur.
Bu barədə Sumqayit24.az-a yerli sakinlər məlumat veriblər.
Qeyd olunub ki, 1-ci mikrorayon, 29/4B ünvanında yerləşən təxminən 60 illik yaşayış binasında nasaz vəziyyətdə olan su boruları tez-tez sıradan çıxır və problem köklü şəkildə həll edilmir.
Şikayətçilərin iddiasına görə, təmir işləri zamanı binanın zirzəmisində qazıntılar aparılır, hətta yaşayış binasının divarındakı hörgü daşları da sökülür.
"Suyun xətlərindəki bir sıra nasazlıqlar və illərdir həllini tapmayan problemlər nəticəsində binanın zirzəmisi tamamilə su ilə dolub. Nəticədə burada antisanitar vəziyyət yaranıb. Bundan əlavə, aparılan qazıntı işlərinin binanın konstruksiyasına mənfi təsir göstərərək çökmə təhlükəsi yaratmasından narahatıq", - deyə sakinlər bildiriblər.
Onlar problemin həlli ilə bağlı təkliflərini də irəli sürüblər:
"Köhnə və paslanmış boruların müvəqqəti üsullarla təmir edilməsi əvəzinə su xətləri tamamilə yenilənməli və mümkün qədər binanın xarici hissəsinə çıxarılmalıdır. Beləliklə, gələcəkdə borularda hər hansı nasazlıq yarandıqda təmir işləri binanın daxilində qazıntı aparılmadan, xarici hissədə həyata keçirilə bilər".
Məsələ ilə bağlı İri Şəhərlərin Birləşmiş Su Təchizatı Xidmətindən Sumqayit24.az-a açıqlama verilib:
"Qeyd olunan ünvanda binanın zirzəmisində yerləşən boru xətləri yenilənib. Boruların bir hissəsi şaxta daxilində yerləşdiyindən, dəyişdirilmə işləri zamanı şaxtanın müəyyən hissəsində söküntü aparılıb. İşlər yekunlaşdıqdan sonra həmin hissə bərpa olunub. Hazırda zirzəmidə hər hansı su axıntısı müşahidə edilmir. Görülən işlər nəticəsində problem tam şəkildə həll olunub".
