Sumqayıt sakinləri 1 saylı şəhər xəstəxanasında psixiatr qəbulunda yaranan uzun növbələr və dövlət tərəfindən təmin olunan psixotrop dərmanların verilməməsindən şikayətlənirlər.
Sumqayit24.az-a müraciət edən vətəndaşların sözlərinə görə, şəhərdə uzun müddətdir psixiatr çatışmazlığı müşahidə olunur. Hazırda isə həkimlərin sayının azalması vəziyyəti daha da çətinləşdirib. Bildirilir ki, əvvəllər bir neçə psixiatrın qəbul etdiyi xəstələr hazırda daha az sayda həkimin xidmətindən istifadə etməli olurlar. Nəticədə uzun növbələr yaranır.
Xüsusilə hər ay dövlət təminatlı psixotrop dərmanlarını almaq üçün həkim müayinəsindən keçməli olan xəstələr bu vəziyyətdən narazıdırlar. Onların sözlərinə görə, növbədə saatlarla gözləmək məcburiyyətində qalırlar.
Həmçinin iddia olunur ki, xəstə bir neçə gün gec müraciət etdiyi zaman ona dərmanın tükənə biləcəyi bildirilir. Bu isə dərmanların xəstələrin sayına uyğun planlaşdırılıb-planlaşdırılmaması ilə bağlı suallar yaradır.
Şikayətçilər hesab edirlər ki, psixiatrik xəstələrin mütəmadi qəbul etməli olduğu dövlət təminatlı dərmanların vaxtında verilməsi təmin edilməli, xəstələrin uzun növbələrdə saatlarla gözləməsinin qarşısını almaq üçün əlavə tədbirlər görülməlidir.
Məsələ ilə bağlı TƏBİB-ə sorğu ünvanlanıb. Qurumdan cavab olaraq bildirilib ki, Sumqayıt Tibb Mərkəzinin nəzdindəki 1 nömrəli Sumqayıt Şəhər Xəstəxanasında bir psixiatr fəaliyyət göstərir:
"Psixiatrik xidmətə müraciətlərin çoxluğu səbəbindən günün müəyyən saatlarında növbə sıxlığı yarana bilir.
Vətəndaşların gözləmə müddətinin azaldılması, qəbul prosesinin daha operativ təşkili və müəssisənin psixiatr kadrı ilə təminatının gücləndirilməsi istiqamətində müvafiq tədbirlər görülür.
Psixotrop dərmanlar təsdiq edilmiş siyahı və tibbi göstərişlər əsasında qeydiyyatda olan pasiyentlərə həkim təyinatına uyğun verilir. Ayrı-ayrı dərman vasitələrinin tədarükündə müvəqqəti fasilə yarandığı hallarda müvafiq tələb təqdim edilir və təminatın qısa müddətdə bərpası üçün zəruri tədbirlər həyata keçirilir".
