Sumqayıtda qonşular arasında yaranan mübahisə cinayətlə nəticələnib.
Teleqraf.az-ın məlumatına görə, hadisə 29-cu məhəllədə baş verib. 1963-cü il təvəllüdlü Mehdi mübahisə zamanı Mahirin (adlar şərti verilib – red.) ağız nahiyyəsinə vuraraq, ona xəsarət yetirib.
Mehdinin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Mehdi ona elan olunan ittiham üzrə özünü təqsirli bilib. O, ifadəsində göstərib ki, fevralın 1-də, saat 19 radələrində sonradan adını bildiyi Mahir binadan çıxarkən blokun qapısını örtmədiyi üçün aralarında mübahisə yaranıb. Onun sözlərinə görə, mübahisə zamanı bir dəfə onun ağız nahiyəsindən vurub.
Bu işə Sumqayıt Şəhər Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıq əldə edib. Bu səbəbdən də zərərçəkən ona qarşı şikayətini geri götürüb.
Məhkəmə təqsirləndirilən şəxsin zərərçəkmişlə barışmasını nəzərə alıb. Bu səbəbdən də onun barəsində olan cinayət təqibinə xitam verilib. O, cinayət məsuliyyətindən azad edilib.
