Sumqayıtda məişət tullantılarının yandırılması sakinlərin ciddi narazılığına səbəb olub.
Sumqayit24.az-a daxil olan məlumata görə, hadisə tez-tez şəhərin 10-cu mikrorayonunda, 63 nömrəli binanın arxasında, 24 nömrəli məktəbin yaxınlığında baş verir. İddialara əsasən, naməlum şəxs tez-tez həmin ərazidə zibilləri yandırır.
Şikayətçilərin sözlərinə görə, bu səbəbdən artıq bir neçə dəfə yanğın hadisəsi qeydə alınıb və əraziyə Fövqəladə Hallar Nazirliyinin əməkdaşları cəlb olunublar.
"Sakinlərdən biri gizli şəkildə gəlib zibilləri yandırır və ərazini tərk edir. Kameralar da yoxdur ki, kim olduğu müəyyən edilsin. Zibil qabının yaxınlığından qaz xətti keçir. Yanğının miqyasının genişlənməsindən və daha böyük təhlükəyə çevrilməsindən narahatıq", - deyə şikayətçilərdən biri bildirib.
Sakinlər aidiyyəti qurumlardan məsələnin araşdırılmasını xahiş edirlər.
