Sumqayıt, Gəncə və Bakıda qəzalı yaşayış binalarının texniki cəhətdən təhlükəlilik vəziyyətinə görə prioritetləşdirməklə tərtib edilmiş siyahılar üzrə görüləcək tədbirlərin sistemləşdirilməsi məqsədilə aidiyyəti dövlət orqanlarının nümayəndələrindən ibarət yaradılmış işçi qrupu tərəfindən təkliflərin hazırlanması ilə bağlı işlər aparılır. Sumqayıt24 bu haqda 6 mart tarixində xəbər verir.
Bu, Nazirlər Kabinetinin 2023-cü il üzrə fəaliyyəti haqqında hesabatında əks olunub.
“Dövlət Şəhərsalma və Arxitektura Komitəsi Bakı, Sumqayıt və Gəncə şəhərlərində qəzalı vəziyyətdə olan yaşayış bina və yataqxana sakinlərinin təhlükəsizliyinin təmin edilməsi tədbirləri üçün 2023-2025-ci illər ərzində dövlət büdcəsindən ümumilikdə 150,0 milyon manat vəsait tələb olunduğuna dair müraciət olunub. Nazirlər Kabinetinin müvafiq sərəncamı ilə sakinlərin təhlükəsizliyinin təmin edilməsi və mənzil-məişət şəraitinin yaxşılaşdırılması ilə əlaqədar 2023-cü ildə görüləcək işlərin maliyyələşdirilməsi üçün Komitəyə 50 milyon manat vəsait ayrılıb. Sözügedən tədbirlərin həyata keçirilməsi üçün maliyyə təminatının yaradılması məqsədilə 2024-cü il dövlət büdcəsində 50 milyon manat vəsait proqnozlaşdırılıb və 2025-ci ilin proqnoz göstəricilərində qalan vəsaitin nəzərdə tutulması ilə bağlı zəruri tədbirlər görülür”, – deyə bildirilib.
