Sumqayıt şəhərində qəzalı vəziyyətdə olan ağacla bağlı məsələ hələ də açıq qalır.
Sumqayit24.az xəbər verir ki, şəhərin Ağa Quliyev küçəsində yerləşən və aşmaq üzrə olan ağac artıq uzun müddətdir ki, həm piyadalar, həm də nəqliyyat vasitələri üçün ciddi təhlükə mənbəyinə çevrilib. Sözügedən ərazidən intensiv istifadə olunduğunu nəzərə alsaq, risk hər gün daha da artır.
Qeyd edək ki, məsələni hələ mart ayının əvvəlində ictimailəşdirmişdik. Bundan sonra Sumqayıt Şəhər İcra Hakimiyyəti tərəfindən açıqlama verilərək bildirilmişdi ki, qəzalı və qurumuş ağacların götürülməsi yalnız müvafiq qurumun – Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinin rəyi əsasında həyata keçirilir və sözügedən ağacla bağlı da müraciət olunacaq:
"Veriləcək rəy əsasında qısa müddət ərzində qanunvericiliyə uyğun olaraq müvafiq tədbirlər görüləcəkdir".
Eyni zamanda, rəsmi açıqlamada ərazidə aqrotexniki qaydalara uyğun budanma işlərinin aparıldığı və təhlükəsizlik səviyyəsinin təmin edildiyi qeyd olunmuşdu.
Lakin üzərindən 3 həftə keçməsinə baxmayaraq, vəziyyət dəyişməyib. Ağac hələ də eyni vəziyyətdə qalır.
Sakinlər haqlı olaraq sual verir: problem yalnız hansısa bədbəxt hadisədən sonra həll olunacaq?
Məsul qurumların operativ reaksiya verməməsi narazılığı daha da artırır. İctimai təhlükəsizlik baxımından bu kimi hallara vaxtında müdaxilə olunması vacib olduğu halda, gecikmələr potensial faciə riskini artırır.
