Sumqayıt Poeziya Evində “Əbədiyyətə qovuşanlar” adlı tədbir baş tutub. Bu haqda 30 yanvar tarixində Sumqayıt24 xəbər verir.
Qubadlı rayon Xıdırlı kənd tam orta məktəbinin hazırladığı tədbir şəhidlik zirvəsinə yüksələn doqquz qəhrəman oğulun xatirəsinə həsr olunub. Yığıncaq şəhidlərimizin əziz xatirəsinin bir dəqiqəlik sükutla yad edilməsi ilə başlayıb, daha sonra Dövlət Himni səslənib.
Məktəbin direktoru Savalan İmanov, Azərbaycan Yazıçılar Birliyinin Sumqayıt bölməsinin sədri Gülnarə Cəmalləddin, Dini Qurumlarla İş üzrə Dövlət Komitəsinin şəhər şöbəsinin sədr müavini Ülvi Məmmədov və müəllimə Elnurə Sadıqova çıxış edərək bildiriblər ki, igid qəhrəmanlarımızın sahəsində bu gün Azərbaycan xalqının qürur hissi keçirməyə, başını uca tutmağa tam mənəvi haqqı var.
Sonra əbədiyyətə qovuşan şəhidlər Xəyal Məmmədov, Mirzə Novruzov, Kərim Əhmədəliyev, İlqar Əhmədov, Natiq Bəxşəliyev, Əbdulməcid Axundov, Heydər Xudiyev, Gəray Məmmədov, Xalid Quliyevin doğmaları çıxış edərək onların şücaətindən söz açıblar.
Tədbir məktəblilərin vətənpərvərlik mövzusunda ifa etdikləri şeirlər və musiqi nömrələrinin səslənməsi ilə davam edib.
