Sumqayıt sakininin avtomobilinə başqa şəxsin adı ilə 40 manat cərimə yazılıb. Sumqayıt24 bu haqda 27 mart tarixində xəbər verir.
Sevda Qasımovanın telefonuna gələn bildirişdə qeyd olunub ki, 30 yanvar tarixində 20 Yanvar dairəsində ona məxsus maşını Kəlbəcər rayon sakini Elvin Abdulrəhmanzadə etibarnaməsiz idarə edib. Cərimə protokolu da Elvinin adına rəsmiləşdirilsə də, məlumat S. Qasımovanın ünvanına göndərilib.
Qadının sözlərinə görə, o, nə Elvini tanıyır, nə də həmin tarixdə avtomobili Bakı şəhərində olub. Cərimə barədə isə bir neçə gün öncə xəbər tutub və nəqliyyat vasitəsinə həbs qoyulacağından ehtiyat edir.
Baş Dövlət Yol Polisi İdarəsindən (BDYPİ) məsələ ilə bağlı Xəzər Xəbər-ə açıqlama verilib. Bildirilib ki, araşdırma aparılacaq və qanun çərçivəsində hüquqi qiymət veriləcək.
