Sumqayıtda məhəllələrin birində yaranmış vəziyyət sakinlərin narahatlığına səbəb olub.
Sumqayit24.az-a daxil olan məlumata görə, 2-ci məhəllədə yerləşən, vaxtilə Sumqayıt mehmanxanası kimi fəaliyyət göstərmiş binada 2022-ci ildə söküntü işlərinə başlanılıb.
Lakin söküntü işləri tam yekunlaşdırılmayıb və ərazi uzun müddətdir baxımsız vəziyyətdə qalıb.
Sakinlərin sözlərinə görə, şəhərin mərkəzi hissəsində yerləşən bu ərazi həm xoşagəlməz mənzərə yaradır, həm də təhlükəsizlik baxımından ciddi risk mənbəyinə çevrilib.
Bildirilib ki, ərazidə hələ də qəzalı vəziyyətdə olan tikili qalıqları mövcuddur. Bu isə xüsusilə uşaqlar və piyadalar üçün təhlükə yaradır.
Sakinlər aidiyyəti qurumların məsələyə diqqət ayıraraq ərazinin tam təmizlənməsini və şəhərin mərkəzinə uyğun şəkildə abadlaşdırılmasını istəyirlər.
Qeyd edək ki, sözügedən ərazidə yerləşən bina uzun illər mehmanxana kimi fəaliyyət göstərib. Daha sonra burada məcburi köçkünlər məskunlaşıb. 4 il əvvəl isə binanın söküntüsünə başlanılıb.
