Sumqayıtda təcili tibbi yardım xidmətinin fəaliyyətindən şikayət var.
Sumqayit24.az-a daxil olan məlumata görə, çağırış edilən ünvanlara təcili yardım briqadalarının gec çatması halları müşahidə olunur. Bu isə bəzi hallarda xəstələrin vəziyyətinin daha da ağırlaşmasına gətirib çıxarır.
Şikayətçilər bildirirlər ki, iradlarını səsləndirən zaman onlara şəhər əhalisinin artdığını, lakin həkim və təcili tibbi yardım maşınlarının sayının artırılmadığı deyilir.
"Bu yaxınlarda qonşuluğumuzda yaşayan yaşlı qadının qan təzyiqi qalxdığı üçün təcili tibbi yardım çağırılıb. Lakin briqada hadisə yerinə gec çatıb. Nəticədə qadın komaya düşüb, beş gün sonra isə vəfat edib", - deyə vətəndaş iddia edib.
Yerli sakinlər aidiyyəti qurumlardan mövcud problemin həlli istiqamətində addım atılmasını tələb edirlər.
Qeyd edək ki, məsələ ilə bağlı müvafiq quruma sorğu ünvanlanıb.
