Sumqayıt şəhəri, 10-cu mikrorayonda yerləşən "Esmanur" uşaq bağçası ilə bağlı müəyyən şikayətlər var.
Valideynlərin sözlərinə görə, bağçada uşaqlar vəd olunan qidalarla təmin olunmurlar. İddia olunur ki, menyuda göstərilən qidalar əvəzinə uşaqlara daha keyfiyyətsiz məhsullar verilir. Belə vəziyyətin artıq bir neçə aydır davam etdiyi bildirilir.
"Hər şey sadəcə görüntü olaraq bizə təqdim edilir. Daima kamera problemi yaşayırıq.
Bağça dekabr ayında qrant layihə qazandı və bu layihə çərçivəsində bizə müəyyən vədlər verildi. Lakin bu vədlərin heç biri qarşılanmadı və şikayətimizi bildirdiyimiz təqdirdə, hər ay "düzələcək" deyə problemlərlə qarşılaşırıq. Uşaq başına 400 manat ödəniş olunur. Lakin bağçada 400 manatlıq heç bir xidmət yoxdur", - deyə valideynlər vurğulayıblar.
Uşaq bağçasının işdən azad olunan tərbiyəçisi Pərvanə Ağayeva da səslənən iddiaları təsdiqləyib:
"İstəmişəm ki, valideynlərin gözünü açım. Uşaqların yeməklərindən kəsilir. Hansı valideyn istəyər ki, övladına ciyərdən hazırlanmış dolma verilsin? Uşaqların şirniyyat saatı var idi, ləğv edildi. Yazırlar ki, uşaqlara cürbəcür meyvələr verilir, amma cəmi bir meyvə verirlər".
Adıçəkilən bağçanın müdiri İlahə Xudiyeva isə bildirib ki, Pərvanə Ağayeva işində yol verdiyi nöqsanlara görə vəzifəsindən uzaqlaşdırılıb. Müdirin sözlərinə görə, keçmiş işçisinin səsləndirdiyi iddialar qərəzlidir və o, bağça rəhbərliyinə qarşı təxribat yaratmağa çalışır.
Ətraflı Baku Tv-nin süjetində:
