Budəfəki məqaləmiz İsveçdə yaşayan və demək olar ki, hər gün insanların həyatını xilas etmək üçün özünü sözün əsl mənasında oda atan Samir haqqındadır.
Samir Musayev 23 fevral 1985-ci ildə Sumqayıt şəhərində dünyaya gəlib. 1992-ci ildə 26 nömrəli orta məktəbə daxil olub və buranı bitirib.
Uşaqlıqdan idmana marağı olan Samir 1996-cı ildən boksla məşğul olaraq dözümlülüyü və mübarizliyi öyrənib. Hərbi xidmətini 2004–2005-ci illərdə şərəflə başa vurduqdan sonra da idman həyatını davam etdirib.
2013-cü ildə Fövqəladə Hallar Nazirliyinin yanğından mühafizə bölməsində işə başlayaraq 6 il boyunca məsuliyyətli və təhlükəli bir peşədə fəaliyyət göstərib.
Sonra həyatda yeni bir səhifə açaraq İsveçə üz tutan Samir, bu gün artıq 4 ildən çoxdur ki, skandinav ölkəsində yanğınsöndürən kimi çalışır. Dil, mühit, sistem fərqli olsa da, Samirin zəhmətkeş və qorxmaz azərbaycanlı obrazı dəyişmir.
