Ali Məhkəmədə Azərbaycan Milli Elmlər Akademiyasının Azad Həmkarlar İttifaqının sədr müavini, professor Raya Nəcəfova barəsindəki qərardan verilən kassasiya şikayətinə baxılıb.
Məhkəmə şikayəti təmin etməyib və əvvəlki qərarı dəyişdirməyib.
Məlumata görə, R.Nəcəfova 11 nəfəri müxtəlif dövlət qurumlarına işə düzəltmək adı ilə aldadaraq pullarını ələ keçirməkdə ittiham olunur. O, həmçinin vəzifəli şəxsin səlahiyyətlərini mənimsəməkdə təqsirləndirilir. İttihamlara görə, zərərçəkmişlərdən bəziləri ilə özünü sabiq nazir müavini Firdovsi Əliyevin köməkçisi kimi təqdim edib.
R.Nəcəfova isə ittihamları qəbul etmir və təqsirsiz olduğunu bildirir.
Yasamal Rayon Məhkəməsi ona 3 il 6 ay müddətinə azadlığın məhdudlaşdırılması cəzası verib. Bakı Apellyasiya Məhkəməsi hökmü qüvvədə saxlayıb.
Qeyd edək ki, R.Nəcəfova deputat Ülvi Quliyevin qudasıdır. O, əvvəllər Azərbaycan Müəllimlər İnstitutunun Sumqayıt filialının direktoru olub.
Mənbə: Pravda.az
