Bakıda liseydə şagirdin güllələdiyi müəllimin son durumu açıqlanıb
Respublika Təcili və Təxirəsalınmaz Tibbi Yardım Mərkəzinin və Kliniki Tibbi Mərkəzin məlumatı:
06.02.2026-ci il tarixində saat 09:10 radələrində Respublika Təcili və Təxirəsalınmaz Tibbi Yardım Mərkəzinə Binəqədi rayonu İdrak liseyindən çağırış qeydə alınıb.
Çağırış ünvanına təcili tibbi yardım briqadası cəlb olunub.
Təcili tibbi yardım briqadası tərəfindən 1997-ci il təvəllüdlü şəxs (qadın) Kliniki Tibbi Mərkəzə hospitalizasiya olunub.
Odlu silahdan açılan atəşlə zədələnmə diaqnozu təyin edilən pasiyentə zəruri tibbi xidmətlər göstərilib, müvafiq laborator və instrumental müayinələr aparılıb.
Hazırda onun müalicəsi Cərrahiyyə şöbəsində davam etdirilir, vəziyyəti orta ağırdır.
***
11:20
Sumqayıtda işləmiş keçmiş məmurun oğlu cinayət törədib.
Bakıda fəaliyyət göstərən "İdrak" liseyində 10-cu sinif şagirdi Ə.Ş xanım müəllimi ov tüfəngi ilə güllələyib. Hadisə tənəffüs zamanı baş verib. Bildirilib ki, güllə müəllimənin boyun nahiyəsinə dəyib. Hazırda dərslərin təxirə salındığı, valideynlərin uşaqlarını məktəbdən götürdüyü qeyd olunur.
Qafqazinfo.az-ın məlumatına görə, Güllə atan şagirdin atası Samir Şirinov əvvələr Sumqayıt Şəhər İcra Hakimiyyətinin Mənzil Kommunal Təsərrüfat Birliyində rəis müavini vəzifəsində işləyib, hazırda işsizdir.
Baş Prokurorluğun yaydığı məlumata əsasən, şagird tərəfindən odlu silahdan atəş açılmaqla müəllimə xəsarət yetirilməsi faktı ilə bağlı Binəqədi rayon prokurorluğunda Azərbaycan Respublikasının Cinayət Məcəlləsinin müvafiq maddəsi ilə cinayət işi başlanaraq ibtidai istintaq aparılır.
Hadisəni törətməkdə şübhəli bilinən şagird prokurorluq tərəfində tutulub.
