Sumqayıtlı 32 yaşlı gənc İtaliyada bədbəxt hadisə nəticəsində həlak olub. Sumqayıt24 bu barədə 6 sentyabr tarixində xəbər verir.
Hadisə avqustun 28-də qeydə alınıb. Sərkər Almazov həyat yoldaşı Helena ilə İtaliyada turist kimi səfərdə olarkən Komo gölündə gəzinti üçün motorlu qayıq kirayə götürüb. Gəzinti zamanı Sərkər suya yıxılıb və dərinliyi təxminən 130 metr olan göldə boğularaq ölüb.
Həyat yoldaşı S.Almazovu xilas etmək üçün suya atılsa da, buna nail ola bilməyib. Qadın bir müddət suyun üzərində qaldıqdan sonra başqa bir qayıq tərəfindən xilas olunub. S.Almazovun meyiti hadisədən 5 gün sonra, suyun 80 metr dərinliyində tapılıb.
Lakin ailənin maddi imkanının məhdud olması səbəbilə Sərkər Almazovun nəşinin Bakıya gətirilməsi mümkün olmayıb. Helena həyat yoldaşının cənazəsinin Bakıya göndərilməsi məqsədilə yardım kampaniyası başladaraq ianə toplayır.
Sərkər 11 nömrəli tam orta məktəbin yetirməsidir. O, Çexiyada xarici şirkətdə çalışıb.
