Sumqayıtlı şagirdlərin də iştirak etdiyi “Muzeylərimizi tanıyaq və tanıtdıraq” interaktiv ekskursiya layihəsi yekunlaşıb. Layihə Respublika Uşaq-Gənclər İnkişaf Mərkəzinin təşkilatçılığı, Təhsil Nazirliyinin dəstəyi ilə baş tutub. Bu haqda mərkəzin Facebook səhifəsinə istinadən xəbər veririk.
Sumqayıtlı məktəblilər layihə çərçivəsində bir günlük ekskursiyalara qatılıblar. Ekskursiya zamanı onlar Heydər Əliyev Mərkəzi, Azərbaycan Milli İncəsənət Muzeyi, Hərbi Qənimətlər Parkı, Qala Arxeoloji-Etnoqrafik Muzey Kompleksi, Azərbaycan Milli Xalça Muzeyi, “İçərişəhər” Dövlət-Tarix Memarlıq Qoruğu, Qobustan Milli Tarixi-Bədii Qoruğu, “Suraxanı” tanker-muzeyi və “YARAT” Müasir İncəsənət Mərkəzi kimi yerlərdə olublar.
Layihəyə ümumilikdə 42 rayondan 13.700 şagird qatılıb. Bu uşaqlar şəhid və Qarabağ müharibəsi veteranlarının övladları, valideynlərini itirmiş, valideyn himayəsindən məhrum olmuş, aztəminatlı ailələrin övladları və internat məktəblərinin şagirdləridir.
