Xəzər bağları yaşayış massivində Sumqayıtda nadir görünən quş tapılıb.
Sumqayit24.az-a müraciət edən sakin bildirib ki, yaşadığı evin həyətinə ayağı sınmış meşə bayquşcuğu qonub. O, quşun müalicəyə ehtiyacı olduğunu deyir.
Vətəndaşın sözlərinə görə, Sumqayıtda bir neçə baytarlıq klinikasına zəng edərək quşun götürülməsini və müalicə olunmasını xahiş edib. Klinikalardan isə gəlib quşu apara bilmədikləri, gətiriləcəyi təqdirdə rentgen müayinəsi və müalicənin aparılmasının mümkün olduğu bildirilib.
Sakin qeyd edir ki, özü I qrup əlildir və quşu klinikaya aparmaq üçün nə fiziki, nə də maddi imkanı yoxdur. Buna görə də quşun müalicə olunması üçün kömək istəyir:
"Dedim ki, gəlin aparın, müalicə edin. Heç kim sahib çıxmadı. Mən özüm I qrup əliləm. Mənə dedilər ki, quşu klinikaya gətirin, rentgen edib baxaq, sonra da ayağına gips qoyaq. Amma mənim nə onu klinikaya aparmağa fiziki gücüm var, nə də evdə saxlamaq imkanım".
Sakin yaralı quşun müalicə olunması və yenidən təbiətə qaytarılması üçün kömək istəyir.
