Azərbaycan Ordusunun 27 sentyabr 2020-ci ildə Qarabağda başladığı uğurlu əks-hücum əməliyyatları nəticəsində oktyabrın 15-də növbəti yaşayış məntəqələri uzun illik işğaldan azad edilib.
Həmin gün Prezident İlham Əliyev "X" (əvvəllər "Twitter") platformasındakı paylaşımında Füzuli, Cəbrayıl və Xocavənd rayonlarının bir sıra yaşayış məntəqələrinin azad olunduğunu elan edib: Arış, Doşulu, Edişə, Düdükçü, Edilli və Çiraquz kəndləri.
Cəbhədə vəziyyət
44 günlük Vətən müharibəsinin 19-cu günü hərbi əməliyyatlar bütün cəbhəboyu davam edib.
Azərbaycan Ordusu cəbhənin müxtəlif istiqamətlərində düşmənin çoxlu sayda canlı qüvvəsini və hərbi texnikasını məhv edib.
Müdafiə Nazirliyinin məlumatına görə, həmin gün Ordumuz düşmənin:
2 ədəd T-72 tankı,
1 ədəd "Tor-M2KM" zenit-raket kompleksi,
4 ədəd BM-21 "Qrad" yaylım atəş sistemi,
1 ədəd D-20, 1 ədəd D-30 və 2 ədəd D-1 haubitsa topu, bir neçə pilotsuz uçuş aparatı və avtomobil texnikasını sıradan çıxarıb.
Ermənistan silahlı qüvvələrinin müvəqqəti işğal altındakı ərazilərdəki qüvvə və ehtiyatlarına ağır zərbə endirilib.
Prezidentin beynəlxalq müsahibələri
Azərbaycan Prezidenti İlham Əliyev Türkiyənin NTV telekanalına və Rusiyanın "Ria Novosti" agentliyinə müsahibə verib.
"Rossiya Seqodnya" Beynəlxalq İnformasiya Agentliyinin baş direktoru Dmitri Kiselyovla müsahibəsində dövlət başçısı müharibənin gedişi, Ermənistanın təxribatları və beynəlxalq reaksiyalar barədə danışıb.
Tərtərdə qəbiristanlığa hücum
Ermənistan silahlı qüvvələri Tərtər şəhər qəbiristanlığında dəfn mərasimi zamanı mülki əhalini qəsdən ağır artilleriya atəşinə tutub. Hücum nəticəsində 3 nəfər həlak olub, 5 nəfər xəsarət alıb.
Baş Prokurorluğun məlumatına görə, ümumilikdə Ermənistanın mülki əhaliyə qarşı hücumları nəticəsində həlak olanların sayı 46 nəfərə, yaralananların sayı isə 223 nəfərə çatıb.
Birinci vitse-prezidentdən beynəlxalq ictimaiyyətə çağırış
Azərbaycanın Birinci vitse-prezidenti Mehriban Əliyeva rəsmi "Instagram" hesabında Ermənistan ordusunun Tərtər qəbiristanlığını atəşə tutması ilə bağlı paylaşım edib. O, dünya ictimaiyyətini Ermənistanın müharibə cinayətlərini qınamağa çağırıb, həlak olanların ailələrinə və yaxınlarına başsağlığı verib.
