Daha bir müəllim dərs demək üçün ucqar kəndi seçib. Sumqayıt24 bu barədə 10 oktyabr tarixində İctimaiTV-yə istinadən xəbər verir.
Suqra Cəfərova adlı müəllim Sumqayıtda anadan olub və həmin şəhərdə orta təhsilini alıb. 2014-2016-cı illərdə Türkiyənin xarici tələbələr üçün ayrılmış təqaüdünü qazanıb və ali təhsilinin magistratura pilləsini burada bitirib. O, bu müddət ərzində Almaniyanın Eberhard Karls Universitetində diplom işi araşdırması da aparıb.
Hazırda Suqra xanım Qusarın İmamqulu kənd məktəbində çalışır. Bir gün baba yurdu Kəlbəcərdə dərs demək arzusu onu ucqar bir dağ kəndini seçməyə sövq edib.
“Bir müəllim bir uşağın həyatını dəyişə bilirsə, bir məktəb bir cəmiyyətin həyatını dəyişə bilər”, - deyə o qeyd edir.
Gənc müəllimi görmək istəyənlər bir bəhanə tapıb hal-əhval tutur, tanış olmağa çalışırlar. Burada ona ümidlər böyükdür, çünkü gəldiyi ilk gündən keçdiyi dərsləri, layihələri ilə İmamqulu kəndinə səs salıb.
Həmin məktəbin ali təhsil almaq üçün sənəd verən 12 məzunundan, 11 nəfəri qəbul olub. Onlardan biri 632 bal toplayıb.
