General rütbəsində də dəyişməyən Polad Həşimov. Uşaq yaşlarından dostları ilə deyib-gülən Polad Həşimov general rütbəsinə ucaldıqdan sonra da xasiyyətini, xarakterini dəyişmədi, həmin sadəliyində qaldı.
Tələbə yoldaşı, ehtiyatda olan zabit Qalib Paşayev:
"Dostlarımızdan birinin toyunda idik. Dedilər Polad da gələcək. General rütbəsini yenicə almışdı. Toyda birdən arxadan kimsə mənə toxundu. Dönüb gördüm Poladdır. Zarafatlarından qalmadı. Qucaqlaşanda ikimiz də kövrəldik. O, dostlarını özü axtarardı".
Tələbə yoldaşı, ehtiyatda olan zabit Natiq Rəhimov:
"Uzun illərdir görüşə bilmirdik. Polad uşaqları – bizi 20 ildən sonra bir yerdə görəndə sevincindən gözləri yaşardı, ağladı. Hamı ilə bir-bir qucaqlaşıb görüşdü".
Polad Həşimov general rütbəsi alanda hamıdan birinci anasını təbrik etmişdi. Evlərinə gedərək "ana, gör sənə nə gətirmişəm", - deyib yeni general formasını ona göstərmişdi. Ancaq generalın işi həmişəki kimi çox idi. Cəmi 10-15 dəqiqə qalıb, yarım stəkan çay içib getmişdi.
Anar Tağıyev
