Sumqayıtda yaşıllıqların üzərindəki həşəratlar diqqət çəkib.
Sumqayit24.az-a daxil olan məlumata görə, 1-ci mikrorayonda, Cəfər Cabbarlı küçəsində yerləşən tut ağaclarının üzərində Amerika ağ kəpənəyi adlanan həşəratlara rast gəlinir.
Məlumat üçün bildirək ki, Amerika ağ kəpənəyi təhlükəli zərərverici hesab olunur. O, 230-dan çox ağac, kol və ot bitkisi ilə qidalanır, tut ağaclarının müxtəlif növləri ilə yanaşı, alça, alma, gavalı, ərik, armud, şaftalı, göyəm, itburnu, yasəmən, göyrüş, qovaq, qarağat və digər bitkilərə ciddi ziyan vurur.
Onun tırtılları tərəfindən yarpaqların kütləvi şəkildə yeyilməsi bitkilərin zəifləməsinə və nəticədə tamamilə məhv olmasına gətirib çıxarır. Tırtılların tükcükləri isə insanlarda allergiya yarada bilər.
Vətəndaşlar aidiyyəti qurumlardan ərazidə araşdırma aparılmasını və zərərvericilərə qarşı müvafiq tədbirlərin görülməsini xahiş edirlər.
