Sumqayıta ad gününə gedən xanım müştəri taksi sürücüsü tərəfindən qarət edilib.
Oxu.Az-ın məlumatına görə, Abşeron rayon sakini Rafiq Əzizov (adı və soyadı şərtidir) Bakıda, metronun "20 Yanvar" stansiyasının qarşısında taksi fəaliyyəti ilə məşğul olarkən ona bir xanım yaxınlaşaraq, Sumqayıta, rəfiqəsinin ad gününə getmək istədiyini bildirib.
Rafiq xanımla razılaşaraq onu ünvana aparacağını bildirib və Sumqayıt istiqamətinə hərəkət edib. Onlar Ceyranbatan qəsəbəsi ərazisinə daxil olarkən, müştəri xanım ondan mağazalardan birində saxlamasını və su almaq istədiyini deyib.
Rafiq qadına bildirib ki, suyu o alacaq və mağazaya yollanıb. Mağazadan iki ədəd tərkibində spirt olan enerji içkisi alıb və xanıma verib. Müştəri həmin suyu içdikdən sonra özünü pis hiss edib və avtomobili saxlamağı xahiş edib. Rafiq həmin vaxt cibindən bıçaq çıxararaq, qadından üzərində olan pulları tələb edib. Məcburiyyət qarşısında qalan xanım çantasında olan 640 manatı taksi sürücüsünə verib. Rafiq bundan sonra qadının əlindəki mobil telefonu da alıb, onu avtomobildən düşürüb, hadisə yerindən qaçıb. Rafiq qadının telefonunu Sumqayıt şəhərində tanışına 50 manata satıb.
Polis əməkdaşlarının keçirdikləri əməliyyatla hadisəni törətməkdə şübhəli bilinən R.Əzizovun yeri müəyyənləşdirilərək saxlanılıb.
Faktla bağlı cinayət işi başlanılıb, iş Sumqayıt Ağır Cinayətlər Məhkəməsinə göndərilib. Məhkəmənin hökmü ilə R.Əzizov 8 il müddətinə azadlıqdan məhrum edilib.
