Sumqayıtda sudan qanunsuz istifadə halları aşkarlanıb. Sumqayıt24 bu haqda 16 may tarixində “Azərsu” ASC-yə istinadən xəbər verir.
“Las Vegas” restoranında sahibkar texniki şərt almadan, müqavilə bağlamadan çəkdiyi 32 mm-lik diametrli boru ilə sudan qanunsuz istifadə edib.
Bənzər vəziyyətə “asfaltzavod” adlanan ərazidə də rast gəlinib. Burada fəaliyyət göstərən daş sexinin sahibi sudan uçotsuz istifadə edib.
Çerkassı küçəsində yerləşən avtomobil təmiri sexinin sahibi də fərdi xəttini özbaşına şəbəkəyə qoşub.
Nəzarət tədbirləri zamanı fərdi yaşayış evlərində də sudan qanunsuz istifadə halları aşkarlanıb. Xəzər bağları adlanan ərazidə evlərin tikintisi ilə məşğul olan şəxslər şəbəkəyə qeyri-qanuni birləşmələr verərək mənzilləri içməli su ilə təmin ediblər. Əraziyə dəvət edilən qəza briqadası su xətlərini ləğv edib.
Sumqayıt Sukanal İdarəsinin rəis müavini Nicat Abdullayev bildirib ki, həm fərdi yaşayış sahəsi sakinləri, həm də sahibkarlar müqavilə bağlamaq üçün idarəyə dəvət olunublar:
“Vətəndaşlardan xahişimiz və tövsiyəmiz budur ki, bu cür hallara yol verməsinlər.”
Qeyd edək ki, yanvar-aprel aylarında Sumqayıt şəhərində 72 bənzər fakt aşkarlanıb. 50-dən çox fakt araşdırılması üçün hüquq-mühafizə orqanlarına təqdim olunub.
