Saray qəsəbəsində içməli su problemi yaşanır. Sumqayıt24 bu haqda 15 may tarixində xəbər verir.
Rəhim Əzimov küçəsində hər axşam saat 23:00-da sular kəsilir. Lakin digər yerlərdəki kimi səhər saatlarında yox, ertəsi gün saat 19:00-da bərpa olunur və cəmi 4 saat gəlir.
Sakinlər dəfələrlə “Azərsu” ASC-yə məsələnin həlli ilə bağlı müraciət etdiklərini bildirirlər:
“Hər dəfə bir söz deyirlər. Gah deyirlər elə şey ola bilməz, orda su fasiləsiz gəlməlidir, gah da deyirlər rejim var, 22:00-da kəsilir, səhər 06:00-da isə gəlir. 3-4 saat su ilə nə edə bilərik? Yemək bişirmək olmur, heç nə çatdırmırıq. İşə və məktəbə gecikirik.
Operatorlar da sözümüzü kəsirlər. Deyirlər ki, bizlik deyil, ərazi üzrə idarəmizə yığın. Verdikləri nömrəyə zəng edirik, çox vaxt götürən olmur.
Hətta keçən dəfə səhər zəng etmişik ki, su gəlmir. Operator bizə deyir ki, suyu açan adam işə gəlməyib. Gələndə açılacaq”.
Qeyd olunur ki, bəzi qonşular artıq su çənləri alıblar. Amma hər kəsin buna maddi imkanı çatmır.
