Alüminium zavodunun tikintisi 1940-cı ildə başlayıb. Lakin Böyük Vətən müharibəsi başlayanda, zavodun inşası dayandırıldı və 1949-cu ildə yenidən bərpa edildi. Sumqayıt Alüminium zavodu, Azərbaycan SSR-nin rəngli metallurgiya sənayesinin ilk və ən böyük müəssisəsi idi. Bundan əlavə, zavod Sumqayıtda təsərrüfat hesabı ilə işləyən ilk müəssisə idi. Sovet İttifaqında ilk dəfə olaraq məhz bu zavod yeraltı və yerüstü korpuslar, yığma dəmir-beton konstruksiyalarla inşa edildi.
Sumqayıt Alüminium zavodunun bütün məhsulunun 75%-dən çoxu dövlət keyfiyyət nişanı ilə buraxılırdı. Zavodun istehsal etdiyi sənaye məhsulları SSRİ-nin 100-dən artıq şəhərinə və bir çox xarici ölkələrə ixrac olunurdu.
8 mart 1955-ci ildə zavodda ilk əlvan metal - alüminium alınmışdır.
Alüminium zavodundakı mühəndislərin çoxu indiki Azərbaycan Dövlət Neft və Sənaye Universitetinin məzunları idi.
1968-ci ildə zavodun məişət soyuducuları üçün buxarlandırıcı istehsal edən sexi, 1974-cü ildə alüminium və latun metallardan qab-qacaq istehsal edən sexi, 1976-cı ildə təkrar alüminium külçəsi istehsal edən sexi işə düşmüşdür.
1980-ci ildə Bolqarıstanın Sofiya şəhərində yerləşən A.İvanov adına Məişət Soyuducuları zavodunda alüminium buxarlandırıcıları çatışmazlığı var idi. Həmin il Alüminium zavodu Bolqarıstana, qısa müddətdə, 14 000 ədəd buxarlandırıcı göndərdi. Bununla da Bolqarıstanın Soyuducu zavodunun fasiləsiz işləməsi təmin edildi.
1988-ci ildə Ermənistanın Spitak şəhərində olan zəlzələdən sonra, əhaliyə kömək məqsədi ilə Alüminium zavodunun işçiləri Ermənistana əlavə olaraq xeyli miqdarda alüminium gondəriblər.
1990-cı ildə Alüminium zavodunda 6618 nəfər işçi çalışırdı.
2009-cu ildə Sumqayıt Alüminium zavodunun fəaliyyəti dayandırılmışdır.
Ədəbiyyat:
