Rafael Ağayev və Firdovsi Fərzəliyevin Moskvadakı Karate1 Premyer Liqasında iştirakdan imtina etmələrinin səbəbləri məlum olub.
Azərbaycan Milli Karate Federasiyasının prezidenti Yaşar Bəşirov və karateçi Fərzəliyev Report-a açıqlama veriblər.
Fərzəliyev yarışmadan imtina səbəbi kimi çəki dərəcəsini dəyişdirməsini göstərib və 16 - 21 noyabr tarixlərində Dubayda keçiriləcək dünya çempionatına qatılmaq istədiyini diqqətə çatdırıb.
"İndi 67 kq-da döyüşürəmsə, əvvəllər 60 kq-da döyüşürdüm və bu çəki dərəcəsində yetərincə reytinqim var idi. Yeni çəkimdə müəyyən yarışlara qatılmalıyam ki, Premyer Liqa turnirində vuruşa bilim",- Fərzəliyev bildirib.
Federasiyasının prezidenti isə açıqlamasında Rafael Ağayevin Premyer Liqadan son anda imtina etməsinin səbəbini bilmədiyini deyib.
“Rafael olimpiyadadan yenicə qayıdıb və yəqin ki, ya yorğun olduğundan ya da ki zədə üzündən yarışa qatılmayıb. Moskvada keçirilmiş yarışdan öncə Ağayev mənə, özünü yaxşı hiss etsə yarışa qatılacağını söyləmişdir. Ola bilsin ki olimpiyadada yüklənmə çox olub və o tam olaraq özünə gələ bilməyib. Qarşıdan dünya çempionatı gəlir və burada iştirak daha önəmlidir. Rafael də özünü qorumaq məqsədilə bu addımı ata bilər”,- Bəşirov əlavə edib.
