Sərxoş sevgilisini bıçaqlayan hamilə qadına hökm oxunub. Sumqayıt24 bu haqda 6 iyun tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Günay Qafarovanın (şərti) məhkəmə istintaqı bitib. Hakim Fəhmin Hümbətovun sədrliyi ilə keçirilən prosesdə qadına şərti cəza verilib.
İttihama görə, hadisə 19 iyul 2022-ci ildə Sumqayıtda yerləşən evdə baş verib. Günay Qafarova qeyri-rəsmi yaşadığı zərərçəkmiş Kərəm Kərimova (şərti) onu hamilə vəziyyətdə qoyub getməsinə, qızlarla görüşməsinə görə iradını bildirib. Bu zaman onlar mübahisə ediblər və qadın Kərəmin qarnına bıçaq saplayıb.
Məhkəmədə Günay Qafarova ittiham üzrə özünü təqsirli bilməyib. O bildirib ki, həmin gün Kərəm evə sərxoş vəziyyətdə gəlib və onu döyməyə, hər yerinə vurmağa başlayıb:
"Həmin vaxt 7 aylıq hamilə idim və Kərəmin uşağıma xəsarət yetirəcəyindən qorxurdum. Hadisə zamanı divanın üzərində bıçaq var idi. Mən də məcbur qalaraq həmin bıçağı götürdüm və Kərəmdən müdafiə olunmaq üçün onu vurdum. Zərərçəkmiş şəxsi bıçaqla vurmaqda məqsədim sadəcə özümü və bətnimdəki uşağımı müdafiə etmək idi. Hazırda Kərəmlə barışmışam".
