Sumqayıt üzrə keçirilən beynəlxalq sorğuda iştirak edən respondentlərin cəmi 13%-i gündəlik üz tutduqları ünvanlara 15 dəqiqə ərzində çata bildiklərini qeyd ediblər.
Sumqayit24.az xəbər verir ki, bu nəticə şəhərlərdə həyat keyfiyyətini araşdıran Friendly City Index (FCI) layihəsinin 2026-cı il üzrə hesabatında əksini tapıb.
Layihə çərçivəsində sorğu Bolt-un tərəfdaşlığı ilə "Syno International" şirkəti tərəfindən aparılıb. Araşdırma sakinlərin gündəlik həyat təcrübəsini, nəqliyyat və xidmətlərin əlçatanlığını, maliyyə rifahını və digər şəhər həyatına təsir edən amilləri əhatə edir.
Bu il ilk dəfə Azərbaycanın Bakı, Sumqayıt, Xırdalan və Gəncə şəhərləri də araşdırmaya daxil edilib.
Nəticələrə əsasən, gündəlik ünvanlara 15 dəqiqə ərzində çatmaq imkanına görə Xırdalan 27%-lə Azərbaycan şəhərləri arasında ilk sırada qərarlaşıb. Bakıda bu göstərici 14%, Sumqayıt və Gəncədə isə 13% təşkil edib.
Ümumilikdə, dörd şəhər üzrə sorğu iştirakçılarının 40%-i gündəlik səfərlərinə təxminən 30 dəqiqə vaxt sərf etdiklərini bildiriblər. Respondentlərin 14,6%-i isə gündəlik ünvanlarına 15 dəqiqə ərzində çatdığını qeyd edib.
Beynəlxalq müqayisədə Xorvatiyanın Pula və Latviyanın Oqre şəhərləri 60%-lik göstərici ilə liderdir. Estoniyanın Kohtla-Yarve şəhərində isə respondentlərin 56%-i gündəlik ünvanlarına 15 dəqiqəyə çatdığını bildirib.
