Fövqəladə Hallar Nazirliyinin (FHN) Sumqayıt Regional Mərkəzi tərəfindən “Gənc xilasedici və yanğınsöndürən” XII Ümumrespublika yarışlarının zona birinciliyi keçirilib.
Sumqayit24.az xəbər verir ki, bu barədə FHN məlumat yayıb.
Keçirilən yarışda Sumqayıt Regional Mərkəzinin əhatə etdiyi şəhər və rayonların təhsil müəssisələrinin komandaları iştirak ediblər.
Turnir “Kombinə edilmiş yanğın estafeti” və “Maneələr zolağı” adlı iki mərhələdən ibarət olub.
Gərgin mübarizə şəraitində keçən yarışın yekunlarına əsasən, Sumqayıt şəhər 4 saylı məktəbin komandası I yerə, Sumqayıt şəhər 15 saylı məktəbin komandası II yerə və Sumqayıt şəhər 30 saylı məktəbin komandası isə III yerə layiq görülüb.
Qeyd edək ki, qalib komanda “Gənc xilasedici və yanğınsöndürən” yarışlarının respublika birinciliyində iştirak etmək hüququ qazanıb.
