Sumqayıt ərazisində fəaliyyət göstərən 6 nömrəli marşrut xətti sakinləri təngə gətirib.
Sumqayit24.az-a sözügedən marşrutla bağlı çox sayda şikayətlər daxil olur. Sərnişinlər “Karsan” avtobuslarının kiçiktutumlu olduğu üçün tələbata tab gətirmədiyini, habelə qrafik üzrə hərəkət etmədiyini bildirirlər.
“Əvvəllər “6 nömrə”lər səhər saat 6-dan yola çıxırdılar. Mən özüm bulvar ərazisində, “MİDA” yaşayış kompleksində yaşayıram. Sumqayıt Dəmiryol Vağzalına getmək üçün hər səhər bu marşruta minməli oluram və mən tək deyiləm, burada mənim kimi yüzlərlə adam var.
Amma son günlər “6 nömrə”lər səhərlər bulvar ərazisində keçmir. Dünən yarım saat, bu gün isə 40 dəqiqə dayanıb gözləmişəm, sonra isə ümidimi itirib taksi çağırmalı oldum.
Belə olmaz. İnsanları da düşünmək lazımdır. Sumqayıtın ictimai nəqliyyata cavabdeh şəxslər və qurumlardan tədbir görmələrini tələb edirəm. Avtobuslar yenilənsin, daha iri tutumlu nəqliyyat vasitələri gətirilsin və qrafik tənzimlənsin”, - deyə narazı sakin bildirib.
