Təhlükəsizlik eksperti Elmar Nurəliyev itlərin hücumundan qorunmağın yollarını açıqlayıb.
Demokrat.az-a danışan ekspert bildirib ki, sürü halında müşahidə olunan və yaxud da quduz itlər kifayət qədər təhlükə riski daşıyır:
“Adətən bu cür itlər şəhər, qəsəbə, kənd və yaxud da rayonlarda günün qaranlıq saatlarında insanların daha az hərəkətdə olduğu yerlərdə azyaşlı və yaşlı insanlara sürü halında hücum edərsə, əlbəttə köməyə kimsə vaxtında çata bilməz. Xüsusən də insanların daha çox cəmləşdiyi yerlərdə bunlar olarsa, əlbəttə bu riski daha da artırmış olar. Təbii ki, bununla bağlı insanların özlərini müdafiə etmək üçün, qorumaq üçün ilk növbədə hansı ərazidə belə hallar yaranıbsa aidiyyatı üzrə müraciət etməlidirlər. İnsanların özlərinin də bilməli olduqları məqam var. Bu cür itlərə hər hansı bir taxta parçası və yaxud da daş atıb onları qorxutmaq, daha da aqressiv hala gətirmək yolverilməzdir”.
Ekspert qeyd edib ki, əgər it insana hücum edibsə, buna məruz qalan şəxs arxasını ona çevirməməlidir:
“Hündür yer varsa, ora çıxmaq, nəqliyyat vasitəsi varsa, içinə əyləşmək, qapalı bir yer varsa, ora girmək lazımdır. Daha sonra əldə olan çanta və yaxud iri əşya ilə hücum zamanı özünü qorumaq olar. Əgər onlar da yoxdursa, geyindiyimiz gödəkçəni soyunub, hücumdan qorunmaq üçün istifadə etmək olar. Gödəkçə olmasa ayaqqabını çıxartmaq olar. Bunların hamısı insanın daha bir təhlükəsiz yer seçməsi üçün zaman qazanmağa imkan verir. Ən əsas məqam isə bu cür itlərə qarşı xüsusi bir cihaz almaq olar. Dükanlarda satılır və insanlar üçün əlçatan qurğudur. Belə ərazilərdə yaşayanlar bu cihazdan alıb üzərlərində daşısalar, daha yaxşı olar. O cihazın vasitəsi ilə özlərini itlərdən qoruya bilərlər”.
Xatırladaq ki, Sumqayıtda bir gündə 6 uşağı itlər dişləyib. Hadisə şəhərin 12-ci mikrorayon ərazisində baş verib. Azyaşlılar bədənin müxtəlif yerlərinin it dişləməsi diaqnozu ilə Sumqayıt Şəhər Uşaq Xəstəxanasına çatdırılıblar.
