Sumqayıt şəhərinin yaxınlığında yerləşən orta məktəbdə sinif otaqlarının sayının az olması müzakirələrə səbəb olub. Bu haqda bu gün, 14 iyun tarixində millət vəkili Vüqar Bayramovun Facebook hesabına istinadən xəbər veririk.
Deputat məcburi köçkünlər üçün salınmış qəsəbədə yerləşən Füzuli rayon 40 saylı orta məktəbin şəraiti ilə tanış olub. Bayramov bildirir ki, 9 illik təhsili olan məktəbdə otaqlar iki hissəyə bölünüb və onların sayı 10-a çatdırılıb.
Sinif otaqlarının çatışmazlığı ilə yanaşı, məktəbin 9 illik olması səbəbindən 10 və 11-ci sinif şagirdləri təhsillərini başqa məktəblərdə davam etdirirlər. Buna görə müəllimlər təhsil ocağına tam orta məktəb statusunun verilməsini xahiş edir.
