“Sarıqaya” yaşayış massivində marşrut problemi yaşanır. Bu barədə 26 oktyabr tarixində Sumqayıt24 xəbər verir.
Məlumata görə, massivdə 5 minə yaxın sakin yaşayır. Onlar avtobus sayının azlığından və nəticədə yaranan sərnişin sıxlığından narazıdırlar. İşə, dərsə vaxtında çatmaq istəyən sakinlər saatlarla avtobus gözləyirlər. Bu səbəbdən də gecikirlər.
Sumqayıtdan yaşayış massivinə yalnız 40 nömrəli marşrut xətti fəaliyyət göstərir ki, onun da avtobuslarının sayı azdır.
"Sumqayıt Nəqliyyat-1" MMC-dən Xəzər Xəbər-ə məsələ ilə bağlı açıqlama verilib. Onlar problemdən xəbərdar olduqlarını və şəhər mərkəzindən gündə növbəli şəkildə bir neçə avtobusun bu massivə ayrıldığını bildiriblər. Ancaq problemin kökü başqadır: "Qarajda maşın var, sadəcə sürücü yoxdur".
Qeyd olunub ki, 40 nömrəli marşrut xəttində sürücü olmaq istəyənlər müraciət edərlərsə, problem qısa vaxt ərzində öz həllini tapacaq.
