Almaniyanın Lüdviqshafen şəhərindən Sumqayıta 22 nəfərlik nümayəndə heyəti səfər edib.
Sumqayit24.az xəbər verir ki, Lüdviqshafen-Sumqayıt Dostları Dərnəyi tərəfindən təşkil olunan səfər iki şəhər arasında uzun illərdir davam edən dostluq və əməkdaşlıq münasibətlərinin möhkəmləndirilməsi məqsədi daşıyır.
Nümayəndə heyətinə Lüdviqshafen şəhərinin Tikinti və Ətraf Mühit üzrə mer müavini Aleksandr Tevald rəhbərlik edir. Proqram çərçivəsində Sumqayıt Şəhər Heydər Əliyev Mərkəzində rəsmi qəbul keçirilib. Görüşdə icra başçısı Zakir Fərəcov qonaqlara Sumqayıtın Almaniya ilə dostluq əlaqələrinin tarixi və əhəmiyyəti barədə geniş çıxış edib.
Zakir Fərəcov öz çıxışında bildirib ki, Sumqayıt şəhəri 1977-ci ildən etibarən Lüdviqshafen şəhəri ilə rəsmi qardaşlaşma münasibətləri qurub. Ötən illər ərzində bu əlaqələr yalnız sənədlərlə deyil, reallıqda baş tutan qarşılıqlı səfərlər, məktəb və universitetlərarası mübadilələr, mədəniyyət tədbirləri və birgə təşəbbüslərlə möhkəmlənib. Biz bu dostluq körpüsünü daha da möhkəmləndirməli və gələcək nəsillərə ötürməliyik.
Görüşdə çıxış edən Aleksandr Tevald və nümayəndə heyətinin digər üzvləri bu səfərin xalqlar arasında anlayışın və dostluğun möhkəmlənməsi üçün bir fürsət olduğunu vurğulayıblar.
Səfər çərçivəsində nümayəndə heyəti Sumqayıtdan sonra Azərbaycanın digər bölgələrinə, o cümlədən Naxçıvan Muxtar Respublikasına səfərlər edəcək, ölkənin tarixi-mədəni irsi ilə yaxından tanış olacaqlar.
