Saray qəsəbəsində satışa çıxarılan toyuqlar antisanitar şəraitdə kəsilir. Sumqayıt24 bu haqda XəzərTV-yə istinadən yazır.
Sözügedən nöqsan Azadlıq küçəsində, Ruslan Fətəliyev adlı şəxsin fərdi həyətyanı sahəsində fəaliyyət göstərən quş əti sexində aşkar olunub. Qida Təhlükəsizliyi Agentliyinin əməkdaşları tərəfindən burada monitorinq keçirilib. Bu zaman, qanunsuz çalışan həmin sexdə antisanitariya və normativ qaydaların kobud şəkildə pozulduğu müəyyən edilib.
“Müəssisəyə baytarlıq nəzarətindən keçməyən quşların daşınması və kəsimi həyata keçirilir. Burada, zəruri laborator müayinələrə cəlb olunmadan, zoonoz infeksiyalarının profilaktika tədbirləri pozularaq, quş kəsimi və satışı aparılıb”, - deyə, agentliyin əməkdaşı bildirib.
Müəssisənin rəhbəri Fətəliyev, bu işə 1 həftədir ki başladığını, ona görə də aidiyyəti qurumlardan hələlik icazə almadığını etiraf edib: “Mən həmişə qanuni işləmişəm. Sənəd təqdim etmişəm, əvvəl icarə müqaviləsi ilə başqa ərazidə çalışırdım. Buranı isə 7-10 gündür ki açmışam, öz şəxsi həyətimdə az miqdarda toyuq kəsmişəm. Sənədləşdirmək fikrimiz var idi”.
Faktla bağlı qanuna uyğun addımların atılacağı bildirilib.
