Sumqayıtlı şagird qəbul imtahanında 1-ci qrup üzrə maksimal bal toplayanlardan biri olub. Bu haqda bu gün, 28 iyun tarixində Sumqayıt24 xəbər verir.
Toğrul Ağayev imtahanın nəticələri elan olunduqdan sonra etdiyi texniki səhvlə bağlı Apellyasiya komissiyasına müraciət edib. Abituriyentin müraciətinə baxıldıqdan sonra məlum olub ki, o sual kitabçasındakı bir tapşırığın düzgün cavabını cavab kartına kodlaşdırarkən səhvə yol verib. Düzgün cavabı (40) müvafiq xanalara yazdıqdan sonra, həmin xananın altında uyğun rəqəmləri (dörd və sıfır) qaralayarkən “0”-ın altında əlavə olaraq “.” xanasını da qaralayıb. Bu səbəbdən sualın cavabı avtomatik olaraq səhv kimi qeydə alınıb.
Nəticədə Apellyasiya komissiyası, kodlaşdırma səhvi olduğu üçün, abituriyentin xeyrinə qərar verib. Beləliklə, Toğrul Ağayev 1-ci qrup üzrə qəbul imtahanının 2-ci mərhələsində 400 bal toplayıb.
Abituriyent Sumqayıt şəhər N. Gəncəvi adına Texniki və təbiət elmləri liseyinin məzunudur.
