Sumqayıt Apellyasiya Məhkəməsində iclas keçirilib. Sumqayıt24 bu haqda məhkəmənin Facebook səhifəsinə istinadən xəbər verir.
Burada Rəyasət Heyətinin üzvləri və Apellyasiya Məhkəməsinin yurisdiksiyasına aid olan birinci instansiya məhkəmələrinin sədrləri iştirak edib. İclas 2022-ci ilin birinci yarısının iş planının icrasına həsr olunub.
Çıxış edənlər “Sumqayıt Apellyasiya Məhkəməsində baxılmış cinayət işlərində məhkəməyə qədər icraat zamanı prosessual qanunvericiliyin tələblərinə əməl edilməsi vəziyyətinə dair” və “2021-ci ildə Sumqayıt Apellyasiya Məhkəməsinin yurisdiksiyasına aid olan məhkəmələrdə baxılan mülki işlərdə ipoteka predmeti olan əmlakların qiymətləndirilməsi vəziyyətinə dair” mövzuları haqqında məlumat verib, bununla bağlı geniş müzakirələr aparıblar.
Rəyasət Heyətinin üzvləri, işlərə baxılarkən yol verilən bir sıra nöqsanı məhkəmələrin sədrlərinin diqqətinə çatdırıb. Açıq səsvermə yolu ilə isə gündəlikdə olan məsələlərə dair müvafiq qərarlar qəbul edilib.
