"Aprelin 14-dən başlayaraq iyunun 24-dək davam edəcək Arietid meteor yağışı bu gün ən yüksək fəallığa malik olacaq".
Sumqayit24.az xəbər verir ki, bu barədə Bakı Dövlət Universitetinin (BDU) Fizika fakültəsinin Astrofizika kafedrası məlumat yayıb.
Bildirilib ki, meteor yağışının pik nöqtəsinə çatması iyunun 10-u Bakı vaxtı ilə saat 18:00 üçün gözlənilir. Ən yaxşı müşahidə şəraiti 11 iyun səhər saatlarında olacaq. Pikdə bu meteor selinin saatda təxminən 50 meteor buraxacağı gözlənilir. Bakıda isə saatda 15 meteor görə bilərik.
"Arietid" sözü meteorların səmadakı çıxış nöqtəsinin (radiantının) yerləşdiyi Qoç (Aries) bürcünün adından gəlir. Astronomiyada meteor yağışları adətən onların radiant nöqtəsinin hansı bürcdə yerləşdiyinə əsasən adlandırılır. Bu meteor axını radiantı Qoç bürcündə olduğuna görə "Arietid" adını alıb. Meteor axınının maksimum fəallığı xüsusilə səhər saatlarında - dan yeri sökülməzdən az əvvəl və ya gün çıxanda baş verir. Bu isə onların adi gecə meteor axınlarından fərqli olaraq müşahidəsinin çətinləşməsinə səbəb olur - çünki gün işığı meteoru sönük göstərir və müşahidəni çətinləşdirir. Buna görə bu axın "gündüz meteor axını" kateqoriyasına daxildir.
