Sumqayıt regional "ASAN xidmət" mərkəzinin könüllüləri əməkdar artist Elman Rəfiyevlə görüşüblər. Bu haqda bu gün, 10 mart tarixində mərkəz öz Facebook hesabında xəbər verir.
Məlumata əsasən, görüş "Sənət xadimləri" layihəsi çərçivəsində keçirilib. 10 mart - Azərbaycan Milli Teatr günü münasibətilə təşkil edilən görüş "Teatrın sirləri" mövzusu çərçivəsində həyata keçirilib. Sonda sənətkar cavanları maraqlandıran suallara cavab verib.
Elman Rəfiyev 19 yanvar 1971-ci ildə Sumqayıt şəhərində anadan olub. O, 1992-1993-cü illərdə Dövlət Gənclər Teatrında aktyor işləmişdir. 1994-2000-ci illərdə Gənc Tamaşaçılar teatrının nəzdində fəaliyyət göstərən Bəxtiyar Xanızadənin rəhbərlik etdiyi "Dəli yığıncağı" Pantomima teatr-studiyasında, 2000-ci ildən Dövlət Pantomima teatrında direktor müavini vəzifəsində çalışır, həmçinin aktyorluq fəaliyyətini davam etdirir. 2009-cu ildə isə E. Rəfiyev teatrın direktoru vəzifəsinə təyin olunub.
9 may 2012-ci ildə Azərbaycan Respublikasının Əməkdar artisti fəxri adına layiq görülmüşdür.
