Sumqayıt Nəqliyyat Departamentindən kart problemi ilə bağlı növbəti açıqlama verilib. Sumqayıt24 bu barədə 16 avqust tarixində RealTV-yə istinadən xəbər verir.
Bildiyiniz kimi, şəhərdaxili avtobuslar ötən ilin sentyabrında kartla ödəniş sisteminə keçsə də, bu “yenilik” cəmi iki ay çəkdi. Artıq bir ilə yaxındır ki, sakinlər pullarının batmasından və kart sisteminin bərpa olunmamasından narahatdırlar.
“Sumqayıt Nəqliyyat-1” MMC-nin kadr və hüquq şöbəsinin müdiri Dildar Hümbətova bildirib ki, Türkiyədən yeni kartlar sifariş verilib və qısa zamanda sistem yenidən çalışacaq.
Nəqliyyat Departamentindən verilən açıqlamaya görə isə, istifadəyə yaramayan kartların balansındakı məbləğ yeni sifariş olunmuş kartlara köçürüləcək.
