Avtobus sürücüsü, sükan arxasında mobil telefondan istifadə etdiyinə görə ona narazılığını bildirən sərnişinə hədə-qorxu gəlib. Bu haqda bu gün, 30 may tarixində Xeberle.com-a istinadən xəbər veririk.
Məlumata əsasən, 7 nömrəli avtobusun sürücüsü nəqliyyat vasitəsini idarə edərək telefon ilə danışıb. Nəticədə sərnişin və sürücü arasında mübahisə düşüb.
"Saat təxminən 11:30 radələri idi. 7 nömrəli marşrut avtobusuna mindim. Çox sürətli sürürdü. Sərnişin olaraq bir neçə dəfə yavaş sürməyini xahiş etdim. Lakin sürücü məhəl qoymadı. Üstəlik yol boyu telefonla danışırdı. Növbəti dəfə ona irad bildirəndə məni təhdid etdi. Avtobusda olan müşahidə kameralarına baxış keçirsələr, dediklərimin həqiqət olduğu üzə çıxacaq”, - deyə sərnişin bildirib.
Şikayətçi Sumqayıt Nəqliyyat İdarəsinin "Qaynar xətt”inə müraciət edib.
İdarənin rəis müavini Tofiq Saydumov açıqlamasında bildirib ki, sürücüyə şiddətli töhmət veriləcək və son xəbərdarlıq ediləcək.
