Sumqayıt Mərkəzi Uşaq Kitabxanasında “Azərbaycan” jurnalının ilk nömrəsinin çapdan çıxmasının 100 illiyi ilə əlaqədar bibliopress keçirilib. Bu barədə 28 yanvar tarixində Sumqayıt24 xəbər verir.
“Ədəbi fikir tariximizin nadir incisi” adlı tədbirdə 18 nömrəli məktəbin 7b sinif şagirdləri iştirak ediblər. Kitabxananın multimedia üzrə böyük mütəxəssisi Nəzakət Əliyeva çıxışında 1923-cü ilin yanvarından “Maarif və mədəniyyət” adı ilə nəşrə başlayan, adı ictimai-siyasi və ədəbi-mədəni həyatda baş verən hadisələrə görə 6 dəfə dəyişdirilən “Azərbaycan” jurnalının milli mətbuatımızın inkişafındakı rolundan danışıb.
Məktəblilər jurnalın müxtəlif illərə aid nümunələrindən ibarət sərgi ilə tanış olublar. Sonra ədəbi nəsillərin yaradıcılığından, dünya ədəbiyyatının ən gözəl nümunələrindən parçalar oxuyublar.
Tədbir Nəzakət Əliyevanın mövzuya aid hazırladığı videoçarxın nümayişi ilə bitib.
