Müasir dövrdə Azərbaycandakı ailə modeli bir sıra dəyişikliklərə uğrayıb.
Report.az-ın məlumatına görə, bunu Səhiyyə Nazirliyi 2 nömrəli Klinik Psixiatriya Xəstəxanasının Baş həkimi Leyla Bəşirova “Ailə modeli: çətinliklər və həllər” mövzusunda danışarkən bildirib.
Onun sözlərinə görə, həmin dəyişikliklərdən birincisi ana və atanın rolunun dəyişməsidir:
“Bu da ailəyə yaxşı təsir göstərmir. Halbuki hər bir fərdin ailədə öz rolu var. Amma bu o demək deyil ki, ata işdən gəlibsə mütləq dincəlməli, ana isə evə gəldikdən sonra dərhal ev işləri ilə məşğul olmalıdır. Çünki uşaq evdə ananın iş gördüyünü, atanın isə işləmədiyini görsə, bu, onun gələcək həyatı üçün pis örnək olacaq”.
L.Bəşirova eyni zamanda başqa dəyişikliklərdən də söz açıb:
“Hazırda ölkədə çoxuşaqlı ailələr azdır. Bununla yanaşı, əvvəlki dövrlə müqayisədə bu gün qadınlar da işləyir, avtomobil də sürür. Keçmiş Azərbaycan ailə modelində isə bunlar yox idi. Həmçinin indi ailə psixoloqlarına müraciət də artıb, daha çox canlı seanslara üstünlük verilir və bu, effektivdir”.
Xatırladaq ki, 15 may dünyada Beynəlxalq Ailə Günü kimi qeyd olunur.
